Главная » Aleksandr Lukashenko Islom Karimov xotirasiga hurmat bajo keltirish maqsadida Samarqandga tashrif buyurdi
(

Belarus Respublikasi Prezidenti Aleksandr Lukashenko O`zbekiston Respublikasining Birinchi Prezidenti Islom Karimov xotirasiga hurmat bajo keltirish maqsadida 6 oktyabr kuni Samarqand shahriga tashrif buyurdi. Samarqand xalqaro aeroportida oliy martabali mehmonni O`zbekiston Respublikasi Prezidenti vazifasini bajaruvchi Shavkat Mirziyoev kutib oldi.

Belarus Respublikasi Prezidenti Aleksandr Lukashenko O`zbekiston Respublikasi Prezidenti vazifasini bajaruvchi Shavkat Mirziyoev hamrohligida Islom Karimov qabrini ziyorat qildi.

Aleksandr Lukashenko va Shavkat Mirziyoev O`zbekiston Respublikasining Birinchi Prezidenti Islom Karimov qabriga gul qo`ydilar va uning xotirasiga hurmat bajo keltirdilar.

Oliy martabali mehmon Samarqand shahridagi Forumlar majmuasiga tashrif buyurib, Islom Karimovning rafiqasi Tatyana Karimovaga chuqur hamdardlik izhor etdi.

Forumlar majmuasida O`zbekiston Respublikasi Prezidenti vazifasini bajaruvchi Shavkat Mirziyoev va Belarus Respublikasi Prezidenti Aleksandr Lukashenkoning uchrashuvi bo`lib o`tdi.

Belarus O`zbekistonga Markaziy Osiyodagi asosiy iqtisodiy sherik sifatida qaraydi. Mamlakatlarimiz o`rtasidagi munosabatlar do`stlik va o`zaro manfaatdorlik tamoyillari asosida rivojlanib bormoqda. O`zbekiston Respublikasi bilan Belarus Respublikasi o`rtasida 2008-2017 yillarga mo`ljallangan iqtisodiy hamkorlik to`g`risidagi shartnoma va uning ijrosiga qaratilgan dastur izchil amalga oshirilmoqda.

O`zbekiston Respublikasi Prezidenti vazifasini bajaruvchi Shavkat Mirziyoev Birinchi Prezidentimiz Islom Karimov xotirasiga hurmat bajo keltirish maqsadida mamlakatimizga tashrif buyurgani uchun Belarus Respublikasi Prezidenti Aleksandr Lukashenkoga minnatdorlik bildirdi. Xalqlarimiz o`rtasidagi do`stlik munosabatlari bundan keyin ham izchil davom etishini, mamlakatlarimiz o`rtasidagi hamkorlikni yangi bosqichga ko`tarish zarurligini ta`kidladi.

Belarus Respublikasi Prezidenti Aleksandr Lukashenko O`zbekiston Respublikasining Birinchi Prezidenti Islom Karimov butun faoliyatini o`z xalqi, Vatani ravnaqiga bag`ishlagani, bugun O`zbekiston iqtisodiyoti rivojlangan, tinch va barqaror davlatga aylanganini qayd etdi. Islom Karimov vafotidan keyingi sinovli kunlarda O`zbekiston xalqi donoligini, yuksak madaniyatini va hamjihatligini yana bir bor namoyon etganini, shunday buyuk zaminga tashrif buyurganidan mamnunligini ta`kidladi.

Birlashgan Millatlar Tashkiloti Bosh Assambleyasining yaqinda bo`lib o`tgan 71-sessiyasida majlis ishtirokchilari Islom Karimov xotirasini yodga olib, hurmat bajo keltirgani ham Prezidentimizning xalqaro obro`-e`tiborini yaqqol tasdiqlaydi.

Uchrashuvda O`zbekiston va Belarus o`rtasida turli sohalardagi hamkorlikni yanada rivojlantirishga oid masalalar yuzasidan fikr almashildi.

Shu bilan Belarus Respublikasi Prezidenti Aleksandr Lukashenkoning mamlakatimizga tashrifi nihoyasiga etdi.
Просмотров (92)
Mне нравится 0

Всего комментариев: 0
avatar