Главная » Farg‘onada 6 yildan buyon komada yotgan ayolning holati bo‘yicha ma’lumot berildi
(

Bir necha kun avval ijtimoiy tarmoq va internet saytlarida Farg‘ona shahar tibbiyot birlashmasining reanimatsiya bo‘limida 6 yildan buyon davolanayotgan ayol haqida postlar tarqalib ketdi.
Ana shu xabarlarga tayanib, Uz24’ning yozishicha, 1980-yilda tug‘ilgan bemor ayol Nargiza Ubaydullayeva 2011-yil 27-noyabrda ikkinchi farzandini dunyoga keltirish uchun Farg‘ona shahar markaziy shifoxonasi tug‘ruq bo‘limiga olib kelingan.

Lekin tug‘ruq davomida shifokorlarning xatolari sababli Nargiza “koma paralich” holatiga tushib qolgan. Shundan keyin bemorning turmush o‘rtog‘i u bilan ajrashib Rossiyaga ketib qolgan.

Hozirgi kunda Nargiza Ubaydullayevaning katta farzandi 9 yoshda, kichigi esa 6 yoshda. Ularga bemorning onasi qaraydi va u bu bo‘yicha Prezident virtual qabulxonasiga murojaat qilgan, biroq natijadan darak yo‘q edi. Ko‘p sonli internet foydalanuvchilari bunga o‘z munosabatlarini bildirdi va tabiiyki, mazkur holatga Sog‘liqni saqlash vazirligidan izoh kutdi.

Farg‘ona viloyat Sog‘liqni saqlash boshqarmasi bemor Nargiza Ubaydullayeva holati bo‘yicha ma’lumot berdi.

“Farg‘ona shahar Bursa ko‘chasida istiqomat qiluvchi fuqaro Habibaxon Usmonovaning O‘zbekiston Respublikasi Prezidenti virtual qabulxonasiga qilgan murojaati to‘liq o‘rganib chiqildi. Aniqlanishicha, Habibaxon Usmonovaning qizi Nargiza Ubaydullayeva 2011-yildan buyon Farg‘ona shahar tibbiyot birlashmasining reanimatsiya bo‘limida koma holatda davolanib kelinmoqda.

Bemor Nargiza Ubaydullayevaning kasallik tarixi quyidagicha boshlangan. Bemor 2011-yilning 27-noyabrida soat 06:25 da Farg‘ona shahar markaziy shifoxonasi tug‘ruq bo‘limiga olib kelingan. Navbatchi shifokorlar — R.E.Mamasiddiqov va Z.A.Usmonovalar tomonidan bemor ko‘rikdan o‘tkazilib, quyidagi tashxis qo‘yilgan: Homiladorlik – 2, 38 hafta, tug‘ruq – 2, tug‘ruqning birinchi davri. Asoratlangan akusherlik anamnezi (bachadon chandig‘i). Kamqonlikning og‘ir darajasi.

Shundan so‘ng shifokorlar bachadon chandig‘i nosozligi, tug‘ruq travmatizmining oldini olish maqsadida hayotiy ko‘rsatmaga ko‘ra, shoshilinch ravishda tug‘ruqni operativ yo‘l bilan olib borish zarurligini bemorning qarindoshlariga tushuntirishgan. Bemor shoshilinch operatsiyaga tayyorlanib, shu kunning o‘zida soat 07:00 da operatsiya xonasiga o‘tkazilgan. Operatsiya paytida bemorda o‘tkir nafas va yurak yetishmovchiligi sababli, nafas va yurak faoliyati to‘xtashi kuzatilgan. Yurak faoliyati ikki bora to‘xtashi kuzatilib, ko‘rilgan reanimatsion choralardan so‘ng operatsiya davom ettirilgan va soat 09:15 da yakunlangan. Shundan keyin bemor sun’iy nafas olish apparati yordamida, intensiv davolash maqsadida reanimatsiya bo‘limiga o‘tkazilgan.

Uning ahvoli og‘irlashganligi sababli, 2011-yil 28-noyabr kuni soat 05:45 da viloyat mutaxassilari ishtirokida qayta operatsiyaga olingan. Unda relaparotomiya, bachadon amputatsiyasi, ichki yonbosh arteriyalarini bog‘lash va qorin bo‘shlig‘ini drenajlash operatsiyasi bajarilgan.

2012-yilning aprel oyidan bemorga I guruh nogironligi belgilandi. Farg‘ona shahar Bandlikka ko‘maklashish va aholini ijtimoiy muhofaza qilish markazining tavsiyaga asosan, Farg‘ona shahar hokimining 2012-yil 16-iyuldagi qarori bilan Habibaxon Usmonova bemorga vasiy homiy etib tayinlanib, unga 405 ming so‘m miqdorida nafaqa belgilangan. Bemor N.Ubaydullayeva esa reanimatsiya bo‘limida alohida xonada parvarish qilinmoqda. Hozirgi kundagi tashxisi: surunkali vegetativ holat, oyoq va qo‘l bo‘g‘imlari kontrakturasi, mushaklar distrofiyasi, temir tanqislik kamqonligining o‘rta og‘ir darajasi.

Farg‘ona shahar huquq-tartibot organlari tomonidan tekshiruv o‘tkazilib, tibbiyot birlashmasining ikki nafar shifokori — reanimatolog-anesteziolog Rayim Qoraboyev va vrach ginekolog Rahmat Mamasidiqovlarga nisbatan ushbu davolash jarayonida yo‘l qo‘ygan kamchiliklari uchun jinoiy javobgarlik belgilangan va qonuniy choralar ko‘rilgan.

Ayni kunlarda bemor Nargiza Ubaydullayevaning umumiy ahvoli turg‘un behush, bo‘g‘imlar deformatsiyalangan, muskullar atrofiyalangan. Nafas olishi traxeostomik naycha orqali, vaqti-vaqti bilan yuqori nafas yo‘llari elektr so‘rg‘ich yordamida sanatsiya qilib turiladi. O‘pkalarda sust vezikulyar nafas, gemodinamika stabil. Oziqlanishi oshqozon zondi orqali. Diurez uretral katetr yordamida.

Respublika ishchi guruhi va viloyat Sog‘liqni saqlash boshqarmasi rahbariyatining bemor N.Ubaydullayevani amaldagi qonunda belgilangan tartib asosida “Muruvvat” uyiga joylashtirish taklifi bemorning onasi H.Usmanova tomonidan rad etildi.

Bemor Toshkent vrachlar malakasini oshirish instituti Nevrologiya kafedrasi, Andijon davlat tibbiyot instituti Nevrologiya kafedrasi professorlari, Janubiy Koreya, Hindiston davlatidan tashrif buyurgan mutaxassislar tomonidan ko‘rikdan o‘tkazilib, qo‘yilgan tashxis va davolash muolajalari to‘g‘riligi qayd etilgan.

Jahon sog‘liqni saqlash tashkiloti ma’lumotlariga ko‘ra, dunyoda yuqoridagi holat 0,06 foiz hollarda uchrab turadi. Bunday kasalliklar bilan yillar davomida davolanayotgan bemorga nisbatan ham ma’naviy, ham jismoniy, ham iqtisodiy tomondan juda katta kuch, e’tibor va parvarish talab qilinadi. Belgilangan tartibga asosan, ushbu bemorlar bosqichma-bosqich ravishda jadal terapiya sharoitidan, parvarishlar amalga oshiriladigan statsionarlar sharoitiga o‘tkazilishi talab etiladi. Lekin, ushbu asoratdan so‘ng ro‘y bergan murakkab vaziyatni to‘liq tushungan holda, bemorning qarindoshlari talabini qondirish maqsadida hamda insoniylik nuqtai nazardan bemor N.Ubaydullayevaga 6 yildan buyon faqat reanimatsiya bo‘limida shifokorlar, hamshiralar, qolaversa, barcha katta va kichik tibbiyot xodimlari tomonidan uzluksiz parvarish (oziqlantirish, sanitar ishlovlar, ko‘rpa-to‘shaklarni almashtirish, cho‘miltirish va h.k.) o‘tkazilib kelinmoqda. Jumladan, davlatimiz tomonidan Farg‘ona viloyati hokimligi, Farg‘ona viloyati Sog‘liqni saqlash boshqarmasi, mahalla fuqarolar yig‘ini ko‘magida ko‘plab beminnat mablag‘lar sarf qilib kelinmoqda.

Hozirgi kunda bemor N.Ubaydullayevaga reanimatsion tibbiy muolajalar davom ettirilishiga ko‘rsatma mavjud emas, faqat parvarish darkor. Shunday ekan, ayni damda bemor uy sharoitida yoxud “Muruvvat” uyida parvarishlanishi mumkin”.

Odiljon Umarov, Farg‘ona viloyat Sog‘liqni saqlash boshqarmasi boshlig‘i
Просмотров (248)
Mне нравится 0

Всего комментариев: 0
avatar